A full and critical edition of the text of Hugo Grotius' De Iure Praedae Commentarius (IPC) as preserved in the single extant manuscript, Leiden UL, BPL 917.

Jan Waszink <j.h.waszink@law.leidenuniv.nl>

Next Page Start Previous Page Additions/Deletions First Finished Version Finished Version

circumvenirent interficerentque. quod et factum est. Idemque hominibus Delphis in eam oram pervectis accidit, emto ad proditionem negotiatore Afro, cui Voticao nomen, et nonnulla apud Batavos auctoritas frequenti commercio. Pars enim caesi, pars in arcem Lusitanorum Minensem captivi ducti sunt, quod aliquanto quam caedi peius est. tanta imminent tormenta, tanti cruciatus: quippe cum constet Gallum hominem eodem delatum et ex fuga reprehensum aereae machinae impositum fuisse, atque ita eiectum, ne non illi Phalarim ipso etiam crudelitatis instrumento imitarentur. Accidit et multo postea ut navicula Batavorum non procul arce Minensi a vento prodita immissu Lusitanorum opprimeretur: cumque deprehensi in fluctus desilirent perfossi spiculis et iam mortui funibus tracti sunt, utque praefecto arcis fides fieret egregii facinoris

suffixa palis capita, partim barbaris illorum beneficiariis ad efferandos animos concessa, qui et igni coxisse ut succum elicerent, et ex ossibus bibisse narrantur. Sed nec emta odia adversus Batavorum simplicitatem, nec paratae insidiae adversus providentiam diu valuerunt. Tot periculis indefessi etiamnum littus illud frequentant, et Lusitanos re nulla magis quam fide sua accusant. In quamcunque vero terrarum partem oculos convertimus eadem feritas ubique. nam hostilitas dici non meretur, quae hostibus solita trans-