Sunt haec verba eorum qui Coriolanum accusant: quorum pars vera est, pars supra verum ad invidiam aucta. Verum est dominum praedae esse non militem, non Imperatorem, sed Populum Romanum: sed et illud non minus verum Imperatorem Iure Romano praedae esse dispensatorem atque arbitrum cum summa potestate. Lucius Aemilius apud Livium: captas non deditas diripi urbes, et in his tamen ARBITRIUM esse IMPERATORIS, non militum. ▸Hoc igitur arbitrium interdum Imperatores vitandae invidiae ad alios reiecerunt, ut Camillus ad Senatum: interdum penes se retinuere. Et hi e diversa temporum ratione aut prout ipsi famae, religioni, ambitioni serviebant, diverse usi reperiuntur. Qui sanctissimi haberi volebant praedam non attingebant, sed sive pecunia erat in praeda, eam iubebant Quaestorem Populi Romani percipere, sive res aliae, eas per Quaestorem sub hasta venumdari. Redactam inde pecuniam sunt qui Manubiarum nomine significari volunt. Ea deinde in aerarium per Quaestorem deferebatur, prius tamen, si triumphi res esset, publice ostentata. Ita Pompeius fecit: Pecunia Tigranis, sicuti Pompeio moris erat (notanda sunt haec verba Velleii) redacta in Quaestoris potestatem, ac publicis descripta literis. Ita M. Tullius in bello Parthico, qui ipse in literis ad Sallustium: De praeda mea praeter quaestores urbanos, id est Populum Romanum, teruncium nec attigit, nec tacturus est quisquam. Id autem veteri republica usitatissimum fuit, cuius morem Plautus respiciens
Nunc hanc praedam omnem iam ad Quaestorem deferam:
Et de hominibus captivis
quos emi de praeda de quaestoribus: Hi autem sunt, qui sub corona venditi dicuntur. Alii autem non Quaestori dabant, sed ipsi in aerarium referebant, ut ex verbis quae apud Halicarnassum in eadem accusatione sequuntur facile intelligi potest. Neque tamen impositam ducibus necessitatem hanc fuisse, quod innuere videntur accusatores, ex ▸ historia apparet. ▸ Dabatur enim praeda interdum Diis, interdum his qui militaverant, interdum aliis. Diis aut ipsa corpora, ut spolia quae Romulus Feretrio suspendit, aut ▸, ut ex Pometinis Manubiis Superbus templum Iovis in monte Tarpeio statuit.

Totum autem huius dividendi ordinem Polybius explicat: nempe in dies aut vigilias partem exercitus alteram, aut minorem ad comportandam praedam mitti solere, et quod quisque reperisset id coactum in castra perferre, ut per Tribunos aequaliter distribueretur, vocatis ad partem etiam his qui castra servarant, quique per valetudinem, aut delegata ministeria aberant.