A full and critical edition of the text of Hugo Grotius' De Iure Praedae Commentarius (IPC) as preserved in the single extant manuscript, Leiden UL, BPL 917.

Jan Waszink <j.h.waszink@law.leidenuniv.nl>

Next Page Start Previous Page Additions/Deletions First Finished Version Finished Version

debet id quod principaliter agitur, non quod extrinsecus in consequentiam venit. Imo si proprie loquimur cum Ulpiano non ille damnum dat, sed lucro quo adhuc alter utebatur eum prohibet. Naturale autem est et summo iuri atque etiam aequitati conveniens ut lucrum in medio positum suum quisque malit esse quam alterius etiam qui ante perceperat. Quis ferat querentem opificem quod alter eiusdem artis exercitio ▸

commoda evertat? Batavorum autem causa eo est iustior, quia ipsorum hac in parte utilitas cum totius humani generis utilitate coniuncta est, quam Lusitani eversum eunt. ▸Neque hoc recte dicetur ad aemulationem fieri, ut in re simili ostendit Vasquius: aut enim plane hoc negandum est, aut asseverandum non ad bonam modo verum etiam ad optimam aemulationem fieri, iuxta Hesiodum: ἀγαθὴ δ' ἔρις ἥδε βροτοῖσι Bona lis mortalibus haec est. Nam etiam si quis pietate motus, inquit ille, frumentum in summa penuria vilius venderet, impediretur improba durities eorum hominum qui saeviente penuria suum carius ▸fuerunt vendituri. Verum est talibus modis minui aliorum reditus: nec id negamus, ait: ▸ Quid ergo tam iniquum videri potest, quam Hispanos vectigalem habere Terrarum Orbem, ut nisi ad illorum nutum, nec emere liceat nec vendere? In cunctis civitatibus dardanarios odio atque etiam poenis prosequimur: nec ullum tam nefarium vitae genus videtur quam ista annonae flagellatio. Merito quidem. Naturae enim faciunt iniuriam, quae in commune faecunda est: neque vero censeri debet in usus paucorum reperta negotiatio, sed ut quod alteri deest alterius copia pensaretur, iusto tamen compendio omnibus proposito qui laborem ac periculum transferendi